يا ام جوزف وفوزي ونقولا وشربل ومقبل وبشير، يا أمّ كل الأسامي المحفورة وجع وحنين، يا أم القلب الطيّب الحامل جرح كبير عم ينزف وفا لآخر العمر، منوقف بخشوع ورهبة قدام جرحك تا نشاركك بأحزانك ونأكدلك ،إنو ابنك ما راح ضيعان متل ما بيتذاكى بعض السخفا وقليلي الايمان. ابنك شهيد مش قاتل، ابنك منارة قِيَم للأجيال الجايي واللي رح تجي، تا تحب هالارض متل ما حبّا وتآمن بيسوع متل ما آمن وقدّم دمّو وحياتو تا يشهد لحضورو بالعالم.
ابنك علامة وفا لكل تاريخنا، وإرادة التزام بحلم جدودنا وبيّاتنا بوطن المستحيل، اللي قادر يصير ممكن لأنو بيضّل في ناس مستعدي تضحي كرمالو.
يا ام الشهيد، يا ام كل الاسامي المحفورة، ايمانك بخلّينا أكتر وأكتر نآمن ونحبّ ونضحّي حتى آخر طريق الشهادة، ما تزعلي يا امي ، خسرتي ولد بس ربحتي كل ولاد الناس.
يا شهر ايلول، يا شهر الصليب المرفوع من اول الدني على عنفوان رجال ودم شهدا ودموع أمّات طاهرة، يا صليب يسوع اللي ما مننتصر الا اذا حملناك، انت أعظم من أي علم وصورة وأسم، انت علامة الطريق اللي مشيو فيا البطاركة والقديسين والشهدا، صليبك هوي المنارة الوحيدة اللي بتهدينا على طريق الحق والحرية والكرامة.
إقامة القداس السنوي في الأحد الأول الذي يلي عيد إرتفاع الصليب في14 أيلول
بزمنك يا شهر ايلول رح نضل نجي لعندن، نركع قدام هالكنيسة ونقول وما نتعب ، وحياة اللي راحو واللي صارو الحنين رح نرجع نتلاقى وأكيد رح نرجع نتلاقى. يا رفاق الشهدا الي بعدا وجوه رفقاتكن مطبوعة بالقلب ذاكرة وحنين، وبعدو وجع كتافكن من حمل نعوشون بأعراس رحيلون عم يذكّركّن، مسؤولين انتو للأمانة والعِبَر، الأمانة لكل القِيَم اللي استشهدوا كرمالا تنقلوها نقيّة للأجيال الجايي، والعِِبَر اللي اذا ما علّمتكن بتكونوا ما عرفتو معنى استشهادن.
مؤتمنين انتو على وجودن بالذاكرة وبضمير كل انسان تا نضلّ نتذكر حجم التضحيات وما نغلط بالمستقبل، بحق رفقاتكن ما تسمحو لحدا يتاجر بدمّاتن. يا كلّ الناس من كل الزوايا والمطارح والتسميات، الغرقانين بالقشور متل مرتا قدّام يسوع، شهدائنا ما ماتو كرمال كراسي نواب وصلاحيات مدير عام ورئيس، ماتو كرمال وطن الشهادة مش الجغرافيا، وطن الرسالة مش شنطة السفر، وطن ما بتساعو الدّني مش وطن كل الدّني بتسمسر على حسابو.
يا رجال السياسة اللي شايفين حالن كبار، صدّقو انو ما في كبير إلاّ يسوع المسيح، ممكن ساعتا تتبدل تصرفاتكن اللي عم تزرع حقد وتدّمر مجتمعنا، وتصيرو مسؤولين عن جَد. فهموا بقى، انو وجودنا قيَم مش ارض وشركات ومصاري، وجودنا قِيم من ترجمها بأعمالنا وتصرفاتنا، يسوع باقي وشهدائنا باقيين وانتو رايحين متل كل الناس، فبحق الشهدا اللي بتتذكروهن بالمواسم اللي فيها قطاف وَهمْ، كونوا على مستوى تضحيات الناس وأحلاما، عطيوكن كتير وما رديتو غير الحكي.
يا قبور الرجال النايمي على حلم كبير، رح يضّل شمع المحبة مضوّي قدامك، يا أرز الوفا المغروس بعرق رجال كلاّ عنفوان رح نضلّ نسقيك دموع ودم اذا عطشت.
يا سيدة ايليج، يا سلطانة الشهدا وام الدني، يا حاملي وجعنا ورجانا واحلامنا، منجي دايما لعندك تا نلملم إيمانّا اذا ضعفنا ونزيد محبتنا اذا حقدنا، رجانا الك خللي عينك على رفقاتنا وعلينا، وحمي لبنان من كل عين طامعة وشريرة، لأنو ما النا غير محبتك وحنانك ورعايتك النا.
